ភ្នំពេញ៖ រដ្ឋមន្ត្រីប្រតិភូអមនាយករដ្ឋមន្ត្រី លោក សូ ណារ៉ូ បានគូសបញ្ជាក់ឲ្យដឹងថា តាមរយៈកិច្ចចរចារវាងរាជរដ្ឋាភិបាលកម្ពុជា និងអ្នកវិនិយោគិនជប៉ុន កម្ពុជាអាចនឹងបន្តបញ្ជូនពលករចំនួន៨០០០នាក់បន្ថែមទៀតទៅបម្រើការនៅប្រទេសជប៉ុន។
លោក បានថ្លែងឱ្យដឹងបែបនេះ ក្នុងសន្និសីទសារព័ត៌មានអំពីលទ្ឋផលនៃការចូលរួមកិច្ចប្រជុំកំពូលខួបអនុស្សាវរីយ៍អាស៊ាន-ជប៉ុន របស់សម្តេចធិបតី ហ៊ុន ម៉ាណែត នៅប្រទេសជប៉ុន។
លោក សូ ណារ៉ូ បានលើកឡើងថា រាជរដ្ឋាភិបាលកម្ពុជាដោយមានសម្តេចធិបតី ហ៊ុន ម៉ាណែត ជានាយករដ្ឋមន្ត្រីកម្ពុជា នៅតែបន្តយកចិត្តទុកដាក់ជានិច្ចនូវសុខទុក្ខបងប្អូនខ្មែរនៅក្រៅប្រទេស។
លោក ថ្លែងថា៖«នៅប្រទេសជប៉ុន តាមរយៈការចរចា ប្រទេសកម្ពុជាអាចបញ្ជូនពលករបន្ថែមទៀត អាចបាន៨ពាន់នាក់ទៀត ដើម្បីទៅធ្វើការនៅប្រទេសជប៉ុននាពេលខាងមុខនេះ»។
បើតាមលោក សូ ណារ៉ូ មិនត្រឹមតែពលករខ្មែរដែលធ្វើការនៅប្រទេសជប៉ុនទទួលបានប្រាក់ខែខ្ពស់ប៉ុណ្ណោះទេ ក្រោយបញ្ចប់ការងារនៅប្រទេសជប៉ុនពួកគេ ក៏អាចទទួលបានចំណេះ និងជំនាញដើម្បីប្រកបមុខរបរចិញ្ចឹមគ្រួសារនៅកម្ពុជានាពេលអនាគតផងដែរ។
លោកបន្តថា ជាមួយគ្នានេះសម្តេចធិបតី បានណែនាំឱ្យអាជ្ញាធរកម្ពុជាសម្រួលឱ្យពលរដ្ឋ និងពលករធ្វើលិខិតឆ្លងដែន ដោយមិនចាំបាច់ត្រឡប់ទៅកម្ពុជាវិញនោះទេ៕
